Die Kabelln


Harrie Dreecher

Harrie Dreecher

Drummiln & Dexde: Wenn scho Ofang der Achzicher des heimischa Keesbladd schrabbd „…der Hoofer Dschässvedderan…“, no schenn Dank fiers Gschbräch. Seid neinzerhunnerdneinasibzich (…“ihr kennt eich haaßn wie der wellt, iech schreib Waldschrat nauf mei Drummil“…) schleechder sich mid Schdeggn durch Graud und Rumm: Graudrogg, Dixie, Danzmusigg, Dschäss und Gwaaf, Folgsmusigg, Dheoder, Kärwa- und Bierzeldkabelln, Swing, Schangsongs und annersch Zeich. Das Musigg vo heizerdooch aa af Frängisch ged und an Haufn Freid machd, hod sich bei „Waldschrat“ rausgschdellt, ged bam Michl Sigg seiner „Landmusigg“ am Gezumbl aa wunderbor, und machd midn Gwaaf fier die „Frankorigines“ immernuch vill Schbaß. Aus selbigsmolla Dschobbs alz Gnebfladreher am Mischbuld fiern Bareider Dschässglubb issa BieÄi Verleiherei worn, waal na alda Verschdärger und Drummiln gfalln hoddera zern ausleiha iebrich, und a glaans Doonschdudio is hängagebliem, seider min Kolleeng Grisdof selmoll lusdicha Viecherfilmla musigalisch verdoond hod (… lossd eich moll wos eifalln fier a Schdinkwassermilbn odder na antarkdischn Eiswurm…). Die Laabla kumma zern Daal iebersch Drummiln, Gnebfladreha fiern Dschäss, Kulduurweldn Helmetz, Aldherrnkabelln odder die Hofer Simfonigger Brojeggde rei, odder hald alz Aushilfsschlambm ieberoll aweng. Singa misser aa, wobei singa…nojo, loss des weg wosd ned kost, no fällds ned su auf - iebrich blabbd suwos wie Xang ;-) Werkzeich ba die Frankorigines: Ludwich Drummiln ver fimfasechzich odder jabanischa Yamahas (die baua aa Mobbeds) aus die Neinzicher, dergischa Dschinelln aus Isdanbuhl, zammgwerfilda Schdänder.

Gäd Reverend Roßner

Gäd Reverend Roßner

Bass, Dexde: Orichinool Michbercher, sellmolz ogfangd alz Bäggereischdifdla, heizerdooch maldrädierter alz Reverend die Gunga in der Schull. Seid Neinzerhunnerdachzich machder Musigg, zern Beischbill mid „Efemehra“ (Hailait wor a Aufdridd im Seiblitzer Roggschubfn), a Bladdnbrodugdzion mid (Achdung Englisch) „Deis“, Fe Gläi“ (es erschda moll mideran Mordsdrimmer Weibsbild am Xang), mid DEN SING Deitschland drei Wochn am Schdigg underweex, odder a Laif-DeeVauDee mim Langs Andi vo Gfrees af der Luisnburch. Wenna der MägKaardnies Baul froocherd, obber ned amenda ver die „Biedls“ zweggs aaner Auferschdeehung mied däderd, soocherder „…naa, ka Zeit, muss ba die Frankorigines Bassn…“ – soochder der Bänd wengsdns. Feadn (Zwaadausndsechzer) isser under die Schrifdschdeller ganga af Hochdeitsch (Gott menschelt – Einführung in das Geheimnis der Heiligen Weihnacht vermittelst des Gesanges der Himmlischen Heerscharen aus der Höhe), ko mer kaafn wemmer moch. Werkzeich ba die Frankorigines: Maja Dschässbass Korbus (sauschwer), Fender Kasdem Schobb Brezi Halz (budderwaach), AER Verschdärger (abgmeld, seids ban Harrie an Ambegg mid Rehrn gibd).

Ralf Wunschlmeier

Ralf Wunschlmeier

Gidann: Der Ralf is in Hof af die Weld kumma und gruß worn. Mideran Haufn Gidann im Ruggsagg isser zern schdudiern nausganga ins Fremma, wu sa ganzergor annersch waafn, hod obber nooch a boor Johrna derweecher na Hamweech widder gfunna. Seid ieber zwanzich Johrna schbillder Gidann, Bass und Lehrer in der oberfrängischn Musiggflora und –fauna. Des musigalischa Schbeggdrum ziecht sich vo Ärbert mid Kinsdler und Kabelln im Inna- und Ausland, ieber Schdudio- und Werbungszeich mid eigna Schdiggla bis zer Lehrerärbert in Musigg- und richdicha Schulln hie. Waßwielang schbillder aa scho ban Gery seiner Kuldkabelln „Johnboys“ (Dschonnbois). Am Hofer Dheoder dudder leihweis rim alz Giddarisd odder Bassisd fier Oobern- Mjusigglund Schauspillbrodugziona, und ganz am libbstn fährter neebern Spilln gruußa Laster. Die MB Dschaader Wäi Zuuchmaschina zerrn dann scho amolla die Mercedes Formil Einz Ohänger durch die ganza Weldgschicht, und asu kimmder wengsts amollaa afera Rennschdreckn, wenn aa mideran vill zer gruußn Fohrzeich. Werkzeich ba die Frankorigines: Fender Schdraddo- und Deelekasder, Ebbifon Les Baul, Haniga Glassig Gidann; Diezl, Bluu odder Fender Bäismen Verschdärger; Korg-, Dunlobb-, Boss-, MXR- und Nuxx Buudndreeder.

Dschonnie Bechstaa

Dschonnie Bechstaa

Dasdn Der Bechstaa Dschonnie, a alder Weidesgriener, is a Musigant und Brodduzent und lebbd midDer Bechstaa Dschonnie, a alder Weidesgriener, is a Musigant und Brodduzent und lebbd mid seiner Baggaasch in Nämberch. Sei erschda Fremdschbrooch woar Hochdeitsch. In san Schdudio schraubder heizerdooch Musigg fier vill Firma, Werbung, Kabelln, Solo-Drällerer und wos sunst su dohieblädschert. Ba einicha Kabelln, wus grood basst, schbillder begleidnderweis Dasdn. Nocherd machder nuch – Achdung Fachausdrigg – Wörgschobbs in Songwreiding, Bändarrangschemangs, Bändcoudsching und Bob Biano. Wenneramoll nix zern do hot, dud der schdudierda Hisdooriger und Englischist hinnawidder alz Fremdnfiehrer, Seminorleider odder Dozennd in Nämberch ärbern. Masdns am oldn Reichsbardeidoochgelände midsamst Dokuzendrum im Memorium Nämbercher Brozesse, obber aa in der Oldschdod, do wu die oldn Haiser wohna. Webseidn: http://www.jonnypechstein.com Werkzeich ba die Frankorigines: Fender Rhouds Mk1, Korg CX3 Orchl, Echoledde M40 Verschdärger, Leslie Moddl 16 blus 12“ Laudschbrecher.