Griß Godd bei die Frankorigines …

mir welln doch bluß schbilln… 


Summer Zwaadausndfuchzer, auferan zimlich merbn Bänkla vorna Doonschdudio sinniern der glaa Dreecher und der gruuß Wunschlmeier bei an Seidla Bier iebers Musiggmachn, blußner im Dheoder miderernanner aweng schbilln is werglich vill zerweng. Ausn Bauch raus werd gscheid Grach gmacht, zwaa Wochn speeder kimmt der Roßnersch Gäd derzu, neiwerts nein Herbst nuch der Bechstaa Dschonnie. Die vier Pflänzla aus die oberfrängischn Heiländs (weider hindn sellnera nuch in Heehln wohna) bleedln musigalisch rim wos des Zeich häld und brubiern Stiggla, die wu sa scho immeramoll schbilln wollerdn: Glassiger odder vergessna Juweeln aus Rogg´n Roll- und Bobmusigg – worschd, sulangs inna gfälld und Schbaß machd. Und zwor frei Schnauzn, nix noochmachn missn wies gheererd, sondern hald asu wies denna Fregger grood su gfälld. Ezerd hädds nuch an zern Singa und Bläägn gebraucht, obber kaaner wollt odder hät Zeid ghabt, alzo ham der Gerd und der Harrie ogfangt zern dexdn wie inna die Goschn gwaxn is, Haubdsach des is schee bleed odder bluß schee odder bleed und bassd derzu. Die eigna Schbrooch, einga Arrangschemangs, no do miß hald der Drummler herhaldn bern „Singa“. Das der merra waaft beziehungsweis bläägt wie, ääh, singt – ned olber, des machds aweng wunnerlicher, Haupdsach a Freid ham sa dro. Des musigalischa Schbeggdrum vo der Kabelln beweechd sich wie die Dexde af der noch uhm offna Dichderskaala: Moll schaua wus hiegedd mid den Zeich, sääng mer scho. Hindn naus kimmd ehrlicha, handwerglicha Musigg ohna Ferz und kinstlichs sindeedisch Gequaak, gmachd vo vier gewiefda Hundsfregger: „Naa, die machen nix, die welln fei bluß schbilln“. Besedzung: -Bechschtaa Dschonnie: Dasdn (Rhodes, Orchl, Chor) -Roßnersch Gäd: Digga Saidn (Bass, aweng Gidann, Dexde, Chor) -Dreechersch Harrie: beschbannda Fässla (Drummiln, Dexde, Xang) -Wunschlmeiers Ralf: Saidn (Gidann, Dexd, Chor, Xang)